Dialogu, rruga e vetme për të ecur përpara

17:15 / 5.02.2013

E ardhmja e Kosovës do të varet shumë nga dialogu që do të zhvillojë në tejkalimin e pengesave dhe rrugëtimit drejt Bashkimit Evropian. Në të kaluarën Kosova ka dëshmuar që ka vullnet për të dialoguar dhe kjo mënyrë komunikimi duhet të vazhdojë edhe më tutje. Kështu është vlerësuar në një konferencë me temë: “Kultura e dialogut dhe e ardhmja e Kosovës”, organizuar nga Kuvendi i të Rinjve të Kosovës, ku dialogu u cilësohet si mjet i pazëvendësueshëm për integrimin e Kosovës në Bashkimin Evropian.

Ish presidenti i Kosovës, Fatmir Sejdiu ka vënë theksin në shumë ngjarje nga e kaluara e tij si President dhe rolin që ka pasur dialogu në shtet formimin e Kosovës.

Kurse duke folur për të tashmen, Sejdiu ka thënë se duhet kuptuar që negociatat e tanishme nuk rikthejnë bisedimet për statusin e Kosovës.

“Duke qenë si bartës i funksionit të presidentit të Kosovës në njërën nga fazat më të ndjeshme, të zhvillimit të saj, atë të negociatave të mvetësisë së vendit, domosdo dua të nënvizoj se rruga e dialogut ka qenë alternativa e vetme për të arritur qëllimin tonë për pavarësinë e vendit dhe njohjen ndërkombëtare”, tha Sejdiu.

Ndërkohë për Ministren e Integrimit,Vlora Çitaku, dialogu është vlerë fundamentale e një shoqërie demokratike.

Çitaku ka vlerësuar se nëpërmjet dialogut shtetet e vogla dhe të mëdha “barazohen”, duke mundësuar që të dëgjohet edhe zëri i shteteve të vogla.

“ Dialogu është një platformë e civilizuar e cila na sjellë barazi dhe përmes së cilës ne mund të dëgjojmë të ndryshimit të flasin në të njëjtën kohë. Është dialogimi në mes të shteteve të vogla dhe shteteve të mëdha që mundëson që zëri i të vegjëlve të dëgjohet po aq sa zëri i të mëdhenjve”, tha Çitaku.

E profesori në universitetin “Hasan Prishtina”, Milazim Krasniqi, tha se dialogu ndër fetar dhe ndërkulturor kulturor ndikojnë në mënyrë vendimtare sepse as besimet fetare e as kulturat nuk i kanë krijuar këto probleme.

“Megjithatë kontributet e dialogut mund të japin një ndihmesë së paku për tejkalimin e paragjykimeve dhe të relaksimeve ndëretnike”, tha Krasniqi.

Konferenca e sotme ishte organizuar nga Kuvendi i të Rinjve të Kosovës ./Telegrafi/
 

Komente

Vërejtje:
Telegrafi ka ofruar gjithmonë hapësirë të lire për komentime dhe për diskutim, me qëllimin e mirë të nxitjes së debateve. Por, për shkak të disa komentuesve të papërgjegjshëm, që keqpërdorin këtë mundësi, kemi vendosur ta ndryshojmë qasjen drejt komentimit të lajmeve. Tash e tutje, komentuesit në rubrikat "Lajme" dhe "Ekonomi", profilin e tyre duhet ta autorizojnë me email valid.

Çdo përdorues, në panelin "Settings" duhet të vendos emailin valid, e pastaj të kërkojë që në atë adresë elektronike t'i dërgohet linku për aprovim. Ky link duhet të klikohet, që të autorizohet profili përmes të cilit mund të komentoni.