Dnevnik: Aleanca Kuq e Zi, nacional-ekstremistët e adhuruar tek shqiptarët në Maqedoni!
Mediat maqedonase kanë shkruar për aktivitetin e “Aleancës Kuq e Zi” dhe synimet e saj për të rikthyer, siç thuhet, Manastirin si një nga qytetet e rëndësishme për kulturën dhe traditën shqiptare. Gazeta “Dnevnik” shkruan se me rastin e 100 vjetorit të pavarësisë së shtetit shqiptar, AK ka përgatitur aktivitete në Manastir dhe se kjo lëvizje e sheh këtë qytet si një qendër për promovimin e saj.
Sipas gazetës, AK një kohë të gjatë “ka promovuar idenë për hapjen e Konsullatës Shqiptare në Manastir, mirëpo ajo nuk u bë edhe gjatë kohës së ish-presidentit Bamir Topi”, transmeton INA.
Analistët maqedonas në Shkup nënvizojnë për gazetën se AK shumë lehtë mund të shndërrohet në një kopje të partisë ultra-fashiste greke “Agimi i Artë”, për shkak të programit të saj të njëjtë dhe angazhimit për shtete të pastra etnike.
“Dnevnik” e quan AK-në ultranacionaliste dhe me përfaqësi tashmë të aktivizuara edhe në Maqedoni, Kosovë, Luginë e Preshevë e madje edhe në Greqi për shkak të çështjes çame.
Një burim i afërt me AK-në i ka thënë gazetës se kjo lëvizje angazhohet për ndryshimin e Kushtetutës në Maqedoni në drejtim të modelit të konfederatës dhe krijimin e një Iliride të re, përmes një referendumi demokratik. AK theksohet se ka mbështetje të gjerë tek rinia shqiptare në Maqedoni dhe se kjo është shprehur përmes formave të ndryshme dhe përkrahjes nëpër rrjetet e ndryshme sociale e tubime tjera. /Telegrafi/
