Dy të vdekur e 4 të plagosur në superstradën e "vdekjes"

Aksidenti ndodhi në kryqëzimin e Mamurrasit, kur një automjet tip Toyota me targa KR 7440 A,që drejtohej nga Bashkim Farruku, 56 vjeç, u përplas me një BMV me targa AA 858 FR, që drejtohej nga Ardit Kurrizi 38 vjeç nga Elbasani.

Përplasja mes dy makinave ishte tejet e fortë e për pasojë kanë humbur jetën drejtuesi i BMV-së Ardit Kurrizi dhe Muharrem Farruku 77 vjeç, pasagjer në makinën Toyota.

Në aksident mbeti i plagosur rëndë drejtuesi i Toyotës Bashkim Farruku, i cili është transportuar për në Spitalin Ushtarak të Tiranës në gjendje të rëndë.

Nga përplasja janë plagosur edhe pasagjeret në mjetin Toyota Vera Farruku 54-vjeçe, Xhevrije Farruku 62 vjeçe, dhe Jonida Kalemi 26 vjeç nga Elbasani pasagjere në mjetin BMV.

Tre pasagjeret e plagosura në dy makinat ndodhen jashtë rrezikut për jetën.

Policia e Lezhës bën me dije se makina që drejtohej nga Ardit Kurrizi po udhëtonte drejt Tiranës kur u godit nga pas në mënyrë të befasishme nga mjeti tip Toyota, që drejtohej nga 56-vjeçari Bashkim Farruku.

Nga hetimet e para rezulton se shkak për këtë aksident është bërë mosrespektimi i distancës së sigurisë në lëvizje i mjetit tip Toyota, e drejtuar nga 56-vjeçari Bashkim Farruku dhe shpejtësia e madhe me të cilën lëvizte.

Sipas policisë rrugore arsyet kryesore të aksidenteve në këtë aks rrugor të qarkut të Lezhës, të konsideruar për shkak të aksidenteve vdekjeprurëse si “aksi i vdekjes” janë mosrespektimi i sinjalistikës rrugore, rregullave të qarkullimit rrugor dhe shpejtësia tej normave të lejuara.

Gjatë javës në këtë aks rrugor janë regjistruar edhe tre viktima të tjera si dhe janë plagosur 15 persona të tjerë.

Aksidentet në këtë zonë, por jo vetëm, janë rritur në këto ditë vere për shkak të rritjes së numrit të automjeteve për shkak edhe të kthimit të emigrantëve në atdhe për të pushuar gjatë sezonit të verës, raporton agjencia e lajmeve NOA.al. /Telegrafi/