Dy të arrestuar për mundësim të prostitucionit

10:02 / 10.01.2013

Policia e Kosovës ka arrestuar në Mitrovicë dy persona mbi bazën e dyshimit se të njëjtit ishin të përfshirë në mundësim të prostitucionit, me një femër të moshës së mitur.

Arrestimi i të dyshuarve është realizuar si rezultat i një hetimi operativ i hetuesve policor në konsultim me prokurorin publik të Prokurorisë themelore.

“Gjatë ditës së djeshme, rreth orës 15:35min, Njësia për Hetimin e Trafikimit me Qenie Njerëzore në Mitrovicë, ka realizuar me sukses dhe pa ndonjë incident, arrestimin e dy të dyshuarve, meshkuj, të përkatësisë etnike shqiptar, në një lokal, në rrugën ‘Shemsi Ahmeti’ në Mitrovicë”, thuhet në kumtesë.

Dy të dyshuarit, 31 dhe 35 vjeçar, janë arrestuar mbi bazë të dyshimit se të njëjtit kanë mbajtur viktimën, një femër 16 vjeçare, në situatë të varësisë personale dhe ekonomike, duke e detyruar atë të merret me prostitucion në këmbim të të hollave, duke i siguruar klientë të ndryshëm për të kryer marrëdhënie seksuale në këmbim të parave me vlera të ndryshme.

Dy të dyshuarit janë dërguar në lokalet policore për intervistim dhe pas deklaratave të siguruara nga të njëjtit, në konsultim me prokurorin e shtetit, njëri është liruar nga lokalet policore ndërsa i dyshuari 31 vjeçar, është ndaluar në mbajtje policore deri në 48 orë.

Viktimës së rastit të regjistruar, i është ofruar tretmani mjekësor dhe pas marrjes së deklaratës në prezencë të mbrojtësit të viktimave dhe punëtorit social, e njëjta është dërguar në strehimore të sigurt.

Ndaj të dyshuarve të arrestuar, hetuesit policor do të iniciojnë paraqitje penale për “mundësim të prostitucionit” të paraparë në bazë të nenit 241, të Kodit Penal të Kosovës. /Telegrafi/
 

Komente

Vërejtje:
Telegrafi ka ofruar gjithmonë hapësirë të lire për komentime dhe për diskutim, me qëllimin e mirë të nxitjes së debateve. Por, për shkak të disa komentuesve të papërgjegjshëm, që keqpërdorin këtë mundësi, kemi vendosur ta ndryshojmë qasjen drejt komentimit të lajmeve. Tash e tutje, komentuesit në rubrikat "Lajme" dhe "Ekonomi", profilin e tyre duhet ta autorizojnë me email valid.

Çdo përdorues, në panelin "Settings" duhet të vendos emailin valid, e pastaj të kërkojë që në atë adresë elektronike t'i dërgohet linku për aprovim. Ky link duhet të klikohet, që të autorizohet profili përmes të cilit mund të komentoni.