Elektricistin e mbyt rryma
Përpjekjet për të bërë kyçjen e kabllos elektrike nga shtylla në një shtëpi, ka qenë fatale për elektricistin N.V. (48 vjeç), ka bërë të ditur policia rajonale e Ferizajt. Raportohet se viktima ishte duke punuar në një shtëpi në fshatin Bibaj të Ferizajt. Toger Agim Gashi, zëdhënësi rajonal i policisë, ka thënë se viktima, derisa po bënte lidhjen e kabllos në shtyllën elektrike, ka prekur njërin nga telat me tension dhe për pasojë është përplasur në asfalt. “Me gjithë përpjekjet, 48-vjeçari nuk ka mundur t’u përballojë lëndimeve dhe ka gjetur vdekjen”, ka thënë Gashi, transmeton Kosovapress.
Mësohet se në vendin e ngjarjes, kanë dalë Njësiti i Hetimeve Rajonale të Policisë në Ferizaj, Forenzika Rajonale dhe ekipet e KEK-ut, të cilat e kanë bërë ekzaminimin e vendit të ngjarjes. Ndërkohë që Njësiti Rajonal i Hetimeve po merret me rastin, Prokuroria e Qarkut në Prishtinë, ka urdhëruar që trupi i pajetë i viktimës të dërgohet në Institutin e Mjekësisë Ligjore në Prishtinë. /Telegrafi/
