Emërtimet e institucioneve në kundërshtim me ligjin
Lidhja Demokratike e Kosovës i konsideroi të kundërligjshme vendimet e fundit të Qeverisë për emërtimin e institucioneve themelore të dijes dhe të kulturës në Kosovë.Sipas tyre, dështimet në fushën e arsimit, të shkencës dhe të kulturës Qeveria po përpiqet t’i mbulojë me vendime ekskluzive dhe të kundërligjshme dhe vetëm sa po e dëshmon deficitin e saj intelektual dhe kulturor.
“Universiteti i Prishtinës, Biblioteka Kombëtare dhe Universitare e Kosovës dhe Instituti i Historisë janë emërtuar kështu në Statutet e tyre dhe kjo nuk mund të ndryshohet me vendime të Qeverisë. Ndryshimet mund të bëhen vetëm me ndryshimin e Statuteve, ndërsa kompetencën për miratimin e Statuteve e ka vetëm Kuvendi i Republikës së Kosovës”, thuhet në kumtesë.
LDK i bëri thirrje Qeverisë që të punojë për arsimin, shkencën dhe kulturën, që t’i ndihmojë institucionet dhe jo të fshehë mospunën e vet me vënie emrash.
“Lidhja Demokratike e Kosovës dëshiron të theksojë se në traditën e gjatë evropiane, universitetet e marrin emrin sipas vendit, ndërsa nuk ka asnjë Bibliotekë Kombëtare dhe Universitare që quhet ndryshe, pos me këtë emër. Edhe në këtë rast, Lidhja Demokratike e Kosovës i bën thirrje Qeverisë që të dërgojë për ratifikim në Kuvendin e Republikës së Kosovës vendimet për themelimin e Universitetit të Prizrenit dhe të atij të Pejës, sepse në mungesë ratifikimi këto institucione po veprojnë në kushte jolegale”, thuhet në komunikatë. /Telegrafi/
