Emrat spiunëve shqiptarë në Maqedoni
Komisioni për Lustrimin në Maqedoni ka publikuar mbrëmë në faqen zyrtare emrat dhe dosjet e personave që kanë qenë bashkëpunëtorë të shërbimeve sekrete. Krahas bashkëpunëtorëve maqedonas, janë publikuar edhe emrat e katër spiunëve shqiptarë. Personat e shpallur si bashkëpunëtor të shërbimeve sekrete në të kaluarën janë: Sllobodan Ugrinovski, Zoran Jovanovski (anëtar i këshillit komunal në Rosoman), Vladimir Millcin (regjisor dhe kryetar i Institutit Shoqëri e Hapur – Soros), Faredin Miftari ( Drejtor i burgut), Sejfedin Haruni (ish-deputet dhe kryetar i PPD-së), Jordanço Jevrevski (dekan i Fakultetit të Arteve dramatike), Nikolce Babovski (kandidat për deputet), Vangel Gagacev (ish-gjykatës), Kosta Ballabanov, Shaban Shehu dhe Mahi Nesimi.
Në faqen e Komisionit të Lustrimit janë shpallur vendimet që konfirmojnë këto persona si bashkëpunëtorë të shërbimeve sekrete në të kaluarën, kryesisht bashkëpunëtorë të UDB-së jugosllave, por gjithashtu janë shpallur edhe dokumente dhe dosje plotësuese.
Komisioni për Lustrimin në të ardhmen në bazë të Ligjit të ri gradualisht do të publikojë emrat e bashkëpunëtorëve të shërbimeve sekrete në Maqedoni. /Telegrafi/
