Favorizohet universiteti që nuk i njeh institucionet e Kosovës

Përfaqësues të Ministrisë së Arsimit, Shkencës dhe Teknologjisë së bashku me Zyrën e Tempusit në Kosovë dhe Zyrën e Komisionit Evropian, në një konferencë për media, paraqiten rezultatet e përfituesve të Programi Tempus IV, ku nga 27 aplikime të universiteteve publike dhe private, me nga një program kanë përfituar Universiteti i Prishtinës, ai i Prizrenit dhe një Universitet Privat, kurse universiteti i veriut të Mitrovicës, i cili edhe pas dymbëdhjetë viteve po vazhdon të mos inkuadrohet në sistemin arsimor të Kosovës ka përfituar tri projekte.

Koordinatorja e Tempusit për Kosovë, Kimete Canaj këtë ndarje e ka arsyetuar me synimin e inkuadrimit të këtij universiteti në sistemin arsimor të Kosovës.

“Tri projektet tjera, janë te Universiteti i Mitrovicës, i cili dëshiron të integrohet në strukturën e arsimit të lartë në Kosovë”, ka thënë Canaj.

Drejtori për Arsim të Lartë në Ministrinë e Arsimit të Shkencës, Naim Hasani ka thënë të mos ketë qenë në dijeni që i ashtuquajturi Universiteti Prishtinës në veri të Mitrovicës, ka fituar tri projekte. Sipas tij, integrimi i tij në sistemin arsimor të Kosovës është çështje politike.

“Ne e dimë që në pjesën e veriut funksionon një universitet i cili për momentin nuk i njeh Institucionet e Kosovës, mirëpo ne shpresojmë që ai do të integrohet në bazë të ligjit. Faktikisht ne e kemi ligjin i cili u jep qeverisje komunave edhe në arsimin e lartë. Ata janë të obliguar të integrohen në sistemin e arsimit të lartë”, ka thënë Hasani.

Ndryshe, në projektet përfituese të këtyre universiteteve nuk shihej tendenca e integrimimit të tij në sistemin arsimor të Kosovës .
Gjashtë projektet përfituese, të cilët do të fillojnë së implementuari nga tetori i këtij viti dhe do të zgjasin më së shumti tri vjet, janë inkurajimi i procesit të Zhvillimit të kurrikulave bazuar në rezultatet e të nxënit dhe në mësimdhënie të orientuar në punë kërkimore në Institucionet Private të Arsimit të Lartë, fuqizimi i universiteteve për të përmbushur përgjegjësinë e tyre në sigurimin e cilësisë, reformimi i strukturës ndërdisiplinore dhe inovacioni në Arsimin e lartë për profesione të reja, ristrukturimi i programit studimor të arkitekturës në përputhje me standardet e BE-së, në cikël të gjatë duke e integruar programin master, trajnim i avancuar i mësimdhënësve dhe projekti i fundit titullohet zhvillimi i rrjetit të trajnimit për përmirësimin e arsimit në efikasitetin e energjisë. /Telegrafi/