Femra hakmerret për vrasjen e prindërve
Gjakmarrja këtë herë është larë nga duart e një femre dhe pikërisht Marash Tonaj ka mbetur i vrarë nga duart e saj.Burime zyrtare nga policia thanë për noa.al se ngjarja e ndodhur dy ditë më parë në fshatin Vuksanaj të Dukagjinit në rrugët e këtij fshati ka si autore një femër e cila ka marrë hak për vrasjen e prindërve të saj.
Hetimet intensive bën të mundur që përmes metodave speciale nga strukturat e Krimeve të Rënda në Policinë e Shkodrës, të zbardhej, zbulohej dhe arrestohej autorja e krimit të rëndë.
33 vjeçarja Lena Guri (Pjollaj), banuese në fshatin Vuksanaj të komunës Shalë, u vu në pranga si autore e vrasjes, ndërsa u bë e mundur dhe gjetja e sekuestrimi në cilësinë e provës materiale e armës së krimit, armë zjarri automatik, model 56, armë të cilën autorja e kishte fshehur një zonë të pyllëzuar.
Nga hetimet e kryera mësohet që vrasja të ketë ndodhur për motive gjakmarrje, pasi në vitin 2003 vëllai i viktimës Nik Tonaj, ka vrarë me armë zjarri, për motive të dobëta, shtetasit Nik dhe Lule Pjollaj, prindërit e autores së dyshuar të vrasjes së Marash Tonaj. /Telegrafi/
