Frikë nga keqpërdorimi i fondit për veriun

16:58 / 19.01.2013

Krijimi i një fondi të përbashkët mes Kosovës dhe Serbisë, për veriun, rrezikon që të keqpërdoret pa zhbërjen e strukturave të sigurisë së Serbisë, që veprojnë në veri të Kosovës. Kështu vlerëson analisti nga Instituti KIPRED, Shpend Kursani.

Kryeministri i Kosovës, Hashim Thaçi, dhe ai Serbisë, Ivica Dacic, janë dakorduar për krijimin e një fondi të përbashkët për veriun e Kosovës, fond ky, i cili do të menaxhohet nga përfaqësues të BE-së dhe do të mirëmbahet nga Qeveria e Kosovës dhe ajo e Serbisë.

Shpend Kursani nga instituti KIPRED, thotë për Radio Kosovën se krijimi i një fondi të tillë pa zhbërjen e strukturave paralele në veri, krijon mundësi për keqpërdorimin e këtij fondi nga strukturat e sigurisë së Serbisë që veprojnë në veri.

“Një fond i tillë do të shkon në të mirë të qytetarëve të Kosovës, mirëpo problemi është se mos largimi i strukturave të Serbisë, do t’i minimizojë efektet që ky fond do t’i kishte në të kundërtën, në qoftë se institucionet e Kosovës do të shtriheshin siç parasheh edhe plani i Ahtisarit”, thotë Kursani.

Krijimi i fondit do të shënojë edhe fillimin e bashkëpunimit të serbëve në veri me institucionet e Kosovës. Por, Kursani thotë se problemi qëndron nëse strukturat e sigurisë së Serbisë në veri, do të largohen, apo do të zyrtarizohen nga institucionet e Kosovës.

“Qytetarët e Kosovës do të afrohen përmes këtij fondi me institucionet e Kosovës, por tani duhet të shohim se a do të ofrohen institucionet e Kosovës me strukturat e Serbisë atje. Do të thotë a do të largohen strukturat e Serbisë, apo institucionet e Kosovës do të zyrtarizojnë ato”, tha Kursani.

Ndryshe, sipas mediave në Kosovës, gjatë bisedimeve në Bruksel, kryeministri, Hashim Thaçi ka insistuar që ky fond të mbulojë gjithë regjionin e Mitrovicës, që përfshinë edhe Vushtrrinë, Skënderajn dhe pjesën jugore të Mitrovicës.

Mësohet se shuma e këtij fondi do të jetë 16 milionë euro dhe përfaqësuesit e serbëve të Kosovës do të kenë të drejtë që të bëjnë kërkesa për investimet më me prioritet në atë pjesë të Kosovës. /Telegrafi/
 

Komente

Vërejtje:
Telegrafi ka ofruar gjithmonë hapësirë të lire për komentime dhe për diskutim, me qëllimin e mirë të nxitjes së debateve. Por, për shkak të disa komentuesve të papërgjegjshëm, që keqpërdorin këtë mundësi, kemi vendosur ta ndryshojmë qasjen drejt komentimit të lajmeve. Tash e tutje, komentuesit në rubrikat "Lajme" dhe "Ekonomi", profilin e tyre duhet ta autorizojnë me email valid.

Çdo përdorues, në panelin "Settings" duhet të vendos emailin valid, e pastaj të kërkojë që në atë adresë elektronike t'i dërgohet linku për aprovim. Ky link duhet të klikohet, që të autorizohet profili përmes të cilit mund të komentoni.