Fule: Kosova ta ketë një plan për veriun
Komisionari për zgjerim i Bashkimit Evropian, Stefan Fule, ka kërkuar që Kosova ta ketë një plan për pjesën veriore të Kosovës.Pas takimit të djeshëm në Munih të Gjermanisë, me presidenten e Kosovës Atifete Jahjaga, Fule ka theksuar nevojën për plan afatgjatë dhe gjithëpërfshirës për veriun e Kosovës. Ai ka shtuar se KE është e gatshme ta ndihmoj këtë përpjekje, “në mënyrë teknike dhe financiare”.
Fule ka inkurajuar Kosovën që të jetë e përkushtuar në dialogun me Serbinë, që të jetë konstruktive e fleksibile për zgjidhje kompromisi për çështje të rëndësishme - siç është bashkëpunimi rajonal.
Nëpërmjet kumtesës së tij, të cilën e transmeton Rel, ai ka spikatur se është e rëndësishme që marrëveshjet e arritura me dialog të zbatohen në tërësi dhe që ato t’i mbështesin të gjitha forcat politike në Kosovë.
Gjatë takimit me presidenten Jahjaga, Fule ka përkujtuar se me vendimet e Këshillit të BE-së, të muajit dhjetor, është paraparë forcimi i theksuar i bashkëpunimit ndërmjet BE-së dhe Kosovës. Në këtë kuadër, ai ka theksuar se përgjegjësia për realizimin e perspektivës evropiane të Kosovës është para se gjithash “në anën e autoriteteve të Kosovës”. /Telegrafi/
