Gjetaj: Emisari special për të pagjeturit, i dobishëm
Caktimi i një emisari ndërkombëtar, i cili do të merrej ekskluzivisht me çështjen e të pagjeturve, do të ndikonte që të rritet presioni ndaj Serbisë, ka vlerësuar Prenkë Gjetaj, kryetar i Komisionit qeveritar për personat e pagjetur. Ai ka thënë se humanitetin, që e karakterizon çështjen e të pagjeturve, e mban peng politika.Gjetaj ka deklaruar për Telegrafin se përfaqësuesit ndërkombëtarë duhet ta kenë të qartë se Serbia duhet të kushtëzohet për të mundësuar që të ketë përparime në procesin e identifikimit të personave të pagjetur nga lufta në Kosovë.
Në këtë aspekt, Gjetaj e ka vlerësuar pozitive mundësinë e caktimit të një emisari special, që është përmendur nga Blerim Shala, koordinator në procesin e bisedimeve me Serbinë.
“Deri tash negociatat tona me ekipin e Serbisë për të pagjeturit janë bërë me ndërmjetësimin e Kryqit të Kuq ndërkombëtar, por kjo ka dhënë pak rezultate. Duhet më shumë presion politik”, ka thënë Gjetaj.
Në takimin e parafundit në Bruksel është diskutuar për fatin e 1761 personave të zhdukur, ndërsa kryeministri Hashim Thaçi u ka premtuar familjarëve të të pagjeturve se kjo çështje do të diskutohet seriozisht gjatë takimeve me kryeministrin serb Ivica Dacic. /Telegrafi/
