Grabitet argjendaria në Tiranë
Grabitet argjendaria e vajzës së Rrapo Sinanajt, argjendari i cili humbi jetën 1 vit më parë në argjendarinë e tij, pasi u qëllua me armë zjarri nga vrasësi serial Viktor Gushi. Policia, që është vënë menjëherë në lëvizje pas grabitjes, ka mundur të arrestojë autorët, të cilët u larguan nga një rrugë dytësore në zonën e Domjes. Mësohet se autorët e dyshuar të ngjarjes janë Redi Donrolli, 27 vjeç nga Shkodra, i arratisur nga burgu, dhe Klodian Martini, 28 vjeç nga Dibra.
Grabitja ndodhi mesditën e sotme rreth orës 13:05 në zonën e “Selvisë”, në Tiranë, ndërkohë burime policore bëjnë me dije se autorët, të cilët mbanin kapele në kokë, pasi kanë hyrë në argjendari kanë thyer xhamin ku mbaheshin florinjtë, duke u larguar me shpejtësi me motor pasi kanë arritur të marrin 4 tabakë floriri, transmeton BW.
Nga hetimet paraprake mësohet se në argjendari ka qenë vetëm vajza e argjendarit të ndjerë. Ndërkohë, ka qenë ndërhyrja e policisë private, e cila pasi është përleshur me dy grabitësit, ka tentuar të rekuperojë vetëm pak metra larg argjendarisë një sasi të florinjve.
Dëshmitë e vajzës së Rrapo Sinanajt, si dhe kamerat e sigurisë do të mund të zbardhin gjithë dinamikën e ngjarjes, ndërkohë që policia do Të marrë në pyetje edhe autorët. /Telegrafi/
