Hakmarrje me hedhje eksplozivi në banesë
Një shpërthim eksplozivi është regjistruar pak pas mesnate në një banesë në Fushë-Mamurras. Burime nga policia lokale bëjnë me dije se ngjarja ka ndodhur rreth orës 01:00 në banesën në pronësi të shtetasit Mark Shkreta, i vrarë pak ditë më parë në Tiranë. Nga hetimet paraprake të policisë dyshohet se ngjarja të ketë lidhje me hakmarrjen që ka përfshirë dy familjet Shkreta e Llani.
Mark Shkreta, babai i dy autorëve të atentatit të 9 qershorit në Mamurras ku humbi jetën 9-vjeçari Endrit Llani dhe u plagos rëndë xhaxhai i tij, u vra mëngjesin e 20 korrikut në kryeqytet, nga babai i djalit të vrarë, Jetmir Llani, i shpallur në kërkim nga policia, transmeton BalkanWeb.
Ndërkaq, nga shpërthimi i ndodhur mëngjesin e sotëm, në Fushë Mamurras janë regjistruar vetëm dëme materiale, ndërsa policia vijon hetimet për të hedhur dritë mbi ngjarjen si edhe për të zbuluar autorët e saj. /Telegrafi/
