Hamiti: Gjilani ka qenë dhe mbetet i LDK-së
Nënkryetari i Lidhjes Demokratike të Kosovës, Sabri Hamiti tha sot në Gjilan se historikisht Gjilani ka qenë bastion i LDK-së dhe kështu do të mbetet edhe në të ardhmen. “ LDK-ja do t`i fitojë zgjedhjet në tërë Kosovën dhe në Gjilan”, tha ai në manifestimin e organizuar mm rastin e 23 vjetorit të themelimit dega e LDK-së në Gjilan. Lidhja Demokratike e Kosovës në mënyrë solemne ka shënuar 23 vjetorin e themelimit të degës së saj në Gjilan, me një manifestim të organizuar në sallën e Teatrit të Qytetit, ku merrnin pjesë strukturat qendrore, kryetarët e këtij subjekti nga Anamorava dhe mysafirë të shumtë.
Duke folur në këtë manifestim , nënkryetari i LDK-së, Sabri Hamiti tha se Gjilani historikisht ka qenë dhe do të mbetet bastion i LDK -ë.”LDK-ja do t`i fitojë zgjedhjet në nivel Kosove , por edhe në Gjilan sepse kjo parti është e vetmja alternativë e besueshme për Kosovën. Tani është koha që të punojmë dhe t`i fitojmë zgjedhjet”, tha Hamiti, transmeton rajonipress.
Ndërsa Lutfi Haziri, kryetar i degës së LDK-së në Gjilan, tha se Gjilani nga një qendër e zhvilluar ekonomike është shndërruar në një qytet me një papunësi më të madhe në rajon.
”LDK-ja bindshëm do të kthehet fituese në Gjilan dhe kësaj radhe me votën e qytetarëve të Gjilanit të cilët çdo ditë po shprehen të pakënaqur me këtë qeverisje. Ky pushtet do të ndërrohet, sepse Gjilani po sakatoset çdo vit. Për pesë vite kemi pasur një depresion ekonomik në Gjilan dhe këtë nuk e kanë merituar gjilanasit “ tha Haziri.
Haziri tha se edhe 23 javë janë zgjedhjet dhe “të gjithë duhet të punojmë e luftojmë që të kthehemi aty ku edhe kemi vendin, aty ku edhe meritojmë të qeverisim”.
Kurse Lirije Kajtazi, kryetare e Forumit të Gruas të LDK-së, tha se populli i Gjilanit nuk e ka merituar të përbuzet në këtë mënyrë. Kajtazi tha se LDK po bëhet gati të marrë qeverisjen, sepse kështu po dëshirojnë pjesa dërmuese. / Telegrafi/
