Hoxhaj takon deputetin shqiptar në Malin e Zi
Ministri i Punëve të Jashtme i Republikës së Kosovës, Enver Hoxhaj, ka pritur Genc Nimanbegun, deputet i koalicionit “Forca për Bashkim” në Parlamentin e Malit të Zi. Ministri shprehu mbështetjen e Republikës së Kosovës për shqiptarët në Mal të Zi, duke thënë se shqiptarët e Malit të Zi përbëjnë një hallkë shumë të rëndësishme në raportet e shkëlqyera ndërmjet dy shteteve.Në njoftimin e MPJ-së thuhet se Hoxhaj e ka informuar Nimanbegun për progresin dhe perspektivat e zhvillimeve në shtetin e Kosovës, duke theksuar fuqizimin e vazhdueshëm të subjektivitetit ndërkombëtar të Republikës së Kosovës dhe avancimin e marrëdhënieve miqësore me të gjitha shtetet demokratike të rajonit.
Në këtë kontekst, Hoxhaj vlerësoi bashkëpunimin shumë të mirë me Republikën e Malit të Zi, duke vlerësuar në këtë aspekt rolin dhe kontributin e shqiptarëve dhe përfaqësuesve të tyre politikë në Mal të Zi.
Në anën tjetër, Genci Nimanbegu, deputet shqiptar në Parlamentin e Malit të Zi ka vlerësuar rolin e Republikës së Kosovës që përmes marrëdhënieve miqësore me Malin e Zi të ndikojë në avancimin e vazhdueshëm të pozitës së shqiptarëve në këtë shtet.
Nimanbegu ka theksuar edhe rëndësinë e përmirësimit të infrastrukturës rrugore që lidh dy vendet, sidomos përmes rrugës që lidh Plavën e Gucinë me Deçanin, e cila do të shkurtojë komunikimin ndërmjet dy shteteve dhe qytetarëve. /Telegrafi/
