Irani, gati të sulmojë i pari
Veprime paraprake ushtarake kundër atyre që rrezikojnë interesat kombëtare, ka qenë kërcënimi i fundit i Republikës Islamike të Iranit, si përgjigje ndaj presionit dhe izolimit ndërkombëtar në të cilin ndodhet prej muajsh. Kërcënimi në mënyrë jo të drejtpërdrejtë i drejtohet Izraelit, i cili bashkë me Shtetet e Bashkuara është vendi që më së shumti po ushtron presion mbi Teheranin.
Ndërkohë, dy anijet luftarake iraniane - që sipas opozitës siriane kanë transportuar armë për ushtrinë e Bashar al-Asaad - janë kthyer në Kanalin e Suezit dhe vijojnë rrugën drejt porteve iraniane.
Në vend vazhdon vizita e inspektorëve të Agjencisë Ndërkombëtare për Energjinë Bërthamore, e dyta brenda një muaji. Objektivi është të kuptohet nëse Irani është në gjendje të pasurojë uranium për qëllime ushtarake.
Të hënën Irani ka kërcënuar se do të presë furnizimet me naftë për Italinë, Spanjën, Greqinë, Gjermaninë, Holandën dhe Portugalinë. Një ditë më përpara, të njëjtat kërcënime ishin bërë në drejtim të Britanisë së Madhe dhe Francës. /Telegrafi/
