Ish-majori i KFOR-it e quan Kosovën tokë të majmunëve

Kahrs ka qenë bashkë me pjesëtarët e lëvizjes ekstremiste serbe “Obraz”, në ditën kur “pelegrinë” serbë ia kishin mësyrë Gazimestanit për të shënuar betejën e Kosovës, shkruan sot “Koha Ditore”.

Njeriu që vite para se t`i bashkohej KFOR-it ka punuar si gazetar, pas përfundimit të misionit të tij në Kosovë është dashuruar në Beogradin, ku edhe po jeton. Burime të gazetës kanë shpjeguar se shumë herë gjatë trazirave në veri ai është parë të jetë pjesë e barrikadave dhe i afërt me lëvizjen ekstremiste “Obraz”.

Ditën e Vidovdanit ai kishte mbajtur në xhep një kapelë me simbole serbe dhe një bluzë me mëngë të shkurtra me të njëjtat simbole në bagazhin e automjetit. Kahrs kishte humbur kontrollin kur policia ia kishte gjetur kapelën dhe bluzën, dhe ia kishte marrë ato, sikur edhe çdo pelegrini tjetër që kishte mësyrë Gazimestanit më 28 qershor.

“Ju të gjithë jeni majmunë. Ky është vend i majmunëve”, u kishte thënë Kahrs policëve. Ai ka pretenduar që është gazetar, por kur ia kanë kërkuar kartën e identitetit ka thënë se e ka harruar.

“Kahrs ka kërkuar vazhdimisht të flas me zëdhënësin e policisë dhe ua ka afruar tek fytyrat mikrofonin policëve, duke i ofenduar ata”, shkruhet në vendimin e Gjykatës për Kundërvajtje të datës 29 qershor. Për më shumë, zyrtaren policore që e ka ofenduar me së shumti “aktivisti i të drejtave të serbëve të Kosovës” është pjesëtare e stacionit veri nga komuniteti serb.

Gazeta ka zhvilluar një bisedë me gazetarin norvegjez. Ai nuk ka qenë në gjendje të tregonte se për cilën media punon si gazetar, ndërkaq e ka pranuar se u ka thënë majmunë policëve. /Telegrafi/