Ivanov: E meritojmë anëtarësimin!?
Të bashkuar me një dëshirë: Maqedoni evropiane dhe euroatlantike. Me sukses i tejkaluam të gjitha sfidat me të cilat u ballafaqua vendi ynë në të kaluarën dhe të bashkuar do ta tejkalojmë edhe sfidën e tanishme, është mesazhi që mbrëmë e dërgoi presidenti George Ivanov, në gala-mbrëmjen e organizuar për nder të tij nga Diaspora e Bashkuar Maqedonase, në margjinat e Samitit të NATO-s.Ivanov theksoi se Republika e Maqedonisë i përmbushi kriteret dhe me të drejtë pret ta marrë anëtarësimin e merituar në NATO. “Deri më tani”, theksoi ai, “ishim të penguar që ta realizojmë qëllimin tonë të lartë strategjik për shkak të një arsyeje irracionale”.
Ivanov u përqendrua edhe në aktgjykimin e Gjykatës Ndërkombëtare të Drejtësisë, e cila, potencoi, kërkon qasje të re nga të gjitha vendet-anëtare të NATO-s, qasje e cila do të thotë respektim i aktgjykimit dhe të drejtës ndërkombëtare, transmeton “Zhurnal”.
Sipas tij, ekzistojnë dy mënyra që ta realizojmë qëllimin. Mënyra e parë është që Greqia me përgjegjësi ta respektojë Marrëveshjen kohore dhe aktgjykimin, ashtu siç pritet nga një vend anëtar i NATO-s dhe i Bashkimit Evropian.
“E dyta është që të vijmë deri në zgjidhje të pranueshme të ndërsjellë për kontestin të cilin ne nuk e dëshiruam, kontest i cili na u imponua”. /Telegrafi/
