Izraelitët të irrituar me “Londra 2012”
Vejusha e një atleti izraelit të vrarë në masakrën e Lojrave Olimpike të Mynih 1972-shit kritikoi Komitetin Olimpik Ndërkombëtar (KON) për vendimin e tij të mosmbajtjes së një minute heshtje në ceremoninë hapëse të Lojërave Olimpike që po mbahen në Londër.“Një turp i vërtetë”, e konsideroi Ankie Spitzer këtë vendim, që sipas saj fyen 11 atletët e vrarë nga një komando terroriste palestineze, brenda fshatit olimpik në Mynih.
Kreu i Komitetit Olimpik Ndërkombëtar, Jacques Rogge dhe kryetari i Komitetit Organizativ të Londrës, Sebastian Coe, argumentuan se mbajtja e një minute heshtje në hapje të Lojrave nuk përshtatej me “frymën” e ceremonisë.
“Ky është një turp i vërtetë për KON-in, pasi harroi 11 anëtarë të familjes olimpike. Ata u vranë në tokën “olimpike” dhe ceremonia hapëse ishte momenti më i përshtatshëm për t’i përkujtuar”, deklaroi e veja.
“Thirrja jonë u dëgjua nga e gjithë botë, por vetëm Komiteti Olimpik Ndërkombëtar e bëri veshin të shurdërt e sytë qorr”, shtoi Spitzer, raporton TCH.
Andre Spitzer, një mjeshtër i skermës, ishte një prej viktimave të atij sulmi tragjik, i cili kishte si synim të bënte të njohur çështjen palestineze në të gjithë botën. /Telegrafi/
