Jacobson: Asociacioni, në përputhje me Kushtetutën
Ambasadorja e Shteteve të Bashkuara të Amerikës në Kosovë, Tracey Ann Jacobson pret hapa pozitiv në muajin e ardhshëm për arritjen e një marrëveshjeje mes Kosovës dhe Serbisë në dialogun që po zhvillohet në Bruksel. ”Jemi shumë të inkurajuar me atë që është arritur deri më tani. I kemi parë të dyja palët duke diskutuar në rrugë të mirë. Dhe hapi tjetër do të jetë ai i dakordimit më 20 mars në Bruksel, ku do të marrin pjesë dy kryeministrat dhe zonja Ashton. Besoj se do të fillojmë të shohim marrëveshje specifike në muajt e ardhshëm. Jam e sigurt se marrëveshjet do të jenë në përputhje me Kushtetutën e Kosovës”, ka thënë ajo për RTK.
Për më tepër, Jacobson bën thirrje që kur flitet për kompetenca ekzekutive të Asociacionit të komunave serbe, institucionet e Kosovës të mos kenë frikë nga një gjë e tillë.
”Nuk do të dëshiroja të komentoj se si duhet të jetë asociacioni apo çfarë do të bëjë. Por, dua të theksoj se bazuar në ligjet e Kosovës dhe Kushtetutën, komunat kanë përgjegjësi ekzekutive. Ky është edhe decentralizimi i pushtetit. Dhe, nëse komunat bashkohen dhe koordinohen për ushtrimin e detyrave të tyre, mendoj se nuk ka arsye për t`u frikësuar nga kjo. Mendoj se do të ishte një zhvillim pozitiv”, tha Jacobson.
Sipas saj, Kushtetuta e Kosovës e ka për qëllim sigurimin e mekanizmave të cilët janë në shërbim të nevojave të komunave, duke aluduar kështu në krijimin e asociacionit të komunave serbe. /Telegrafi/
