“Majat e Ballkanit” fut Pejën në hartën botërore të turizmit

Bashkë me të në konkurrim janë edhe dy projekte tjera, një nga Singapori dhe i dyti nga Butani.

Sipas drejtorit komunal për zhvillim ekonomik të Pejës, Sokol Uka, ky projekt ka hyrë në përzgjedhjen finale, gjegjësisht në treshen e nominimit për fitimin e shpërblimit të WTTC për shpërblimin “Turizmi i së nesërmes", çmim që jepet për implementim më të suksesshëm të formave të turizmit të qëndrueshëm në nivel të destinacionit.

“Pasi jemi kualifikuar në garën e ngushtë për të fituar çmimin e parë jemi duke punuar me përkushtim për ta fituar këtë shpërblim”, thotë drejtori Uka, shkruan "Zëri".

Si destinacione turistike unike të veçanta dhe atraktive, këto zona për turistët paraqesin atraksione me një kombinim të të mirës dhe të bukurës të secilit vend, shumëllojshmëri të shërbimeve, kombinim të kulturave dhe traditave, si dhe bukuritë e paprekura të natyrës, për çka secilin destinacion e bën të veçantë dhe atraktiv për vizitorët e vet.

“Projekti në përbërjen e vet ka identifikuar dhe zhvilluar shtegun malor "Majat e Ballkanit" prej 192 km i cili lidh fshatrat malore nga të tri shtetet. Po ashtu në përbërjen e këtij projekti është realizuar bashkëpunim i suksesshëm në mes të policive kufitare që janë dakorduar me autoritetet përkatëse, procedurat e kalimit të kufirit për alpinistët si dhe sistemi i sigurisë në male, trajnimet e udhërrëfyesve malorë me standarde internacionale, trajnime në ngritjen e cilësisë së shërbimeve dhe ushqimit, forcimi i rrjeteve turistike rajonale, si dhe promovimi i shtegut ndërkufitar”, thotë drejtori Uka.

Komuna e Pejës në vitet e fundit ka pasur disa projekte me rëndësi që konkurrojnë në fushën e turizmit. /Telegrafi/