“Qeveria në hije” në kryeqytet, pret përfundimin e procesit zgjedhor në PDK

22:10 / 31.01.2013

Për formimin e Kabinetit të Qeverisjes së Mirë për Prishtinën duhet pritur përfundimin e të gjithë procesit zgjedhor në PDK. Për formimin e kësaj “qeverie në hije në kryeqytet”, ishte vendosur në mars të vitit të kaluar, por kompletimi i anëtarëve nuk është bërë deri tash.

Kryetari i sapozgjedhur i degës së PDK-së në kryeqytet, Lirak Çelaj, ka thënë për Telegrafin se vendimi për personin që do ta drejtojë Kabinetin dhe anëtarët do të vendosin strukturat më të larta drejtuese të partisë, përfshirë këtu kryetarin Hashim Thaçi.

“Kabineti i Qeverisjes së Mirë për Prishtinën do të funksionalizohet shpejt dhe do të shërbejë sipas qëllimit për të cilin është marrë vendimi për t’u krijuar. Më herët PDK-ja kishte vendosur që kabinete të tilla të krijohen në komunat në të cilat është opozitë”, ka thënë Çelaj.

Ai mendon se Kabineti do të funksionojë mirë, edhe pse ka pasur deklarata të tensionuara ndërmjet pretendentëve për kreun e degës së PDK-së në Prishtinë.

Shefi i këshilltarëve komunalë të PDK-së në Komunën e Prishtinës, Shemsi Veseli, ishte tërhequr nga kjo garë, duke u ankuar se gjatë procesit kishte pasur parregullsi.

“Gjithçka ka qenë në kuadër të ‘fair play’, për të dëshmuar garën për këtë post. Nuk ka pasur deklarata armiqësore”, ka thënë Çelaj.

Kur ishte marrë vendimi për themelimin e kabinetit, emri i Lirak Çelajt ishte më i përfolur për të qenë drejtues, por ai vet thotë se për këtë do të vendosin organet drejtuese të partisë.

Kabineti i Qeverisjes së Mirë për Prishtinën është menduar si një “qeveri paralele” përballë komunës së drejtuar nga LDK-ja. /Telegrafi/
 

Komente

Vërejtje:
Telegrafi ka ofruar gjithmonë hapësirë të lire për komentime dhe për diskutim, me qëllimin e mirë të nxitjes së debateve. Por, për shkak të disa komentuesve të papërgjegjshëm, që keqpërdorin këtë mundësi, kemi vendosur ta ndryshojmë qasjen drejt komentimit të lajmeve. Tash e tutje, komentuesit në rubrikat "Lajme" dhe "Ekonomi", profilin e tyre duhet ta autorizojnë me email valid.

Çdo përdorues, në panelin "Settings" duhet të vendos emailin valid, e pastaj të kërkojë që në atë adresë elektronike t'i dërgohet linku për aprovim. Ky link duhet të klikohet, që të autorizohet profili përmes të cilit mund të komentoni.