Kërkohet dorëheqja e ministrit Besimi
Ministri i Mbrojtjes i Maqedonisë, Fatmir Besimi dy ditët e fundit është në qendër të kritikave të institucioneve të larta shtetërore dhe partive politike maqedonase, pas pjesëmarrjes së tij shoqëruar me oficerë të lartë të ARM-së në homazhet në varrezat e dëshmorëve të UÇK-së në Sllupçan të Kumanovës. Presidenti i vendit, Gjorgje Ivanov ka kërkuar që të shqyrtohet keqpërdorimi i detyrës zyrtare nga ministri Besimi dhe prania e katër pjesëtarëve të uniformuar të ARM-së të hënën në varrezat e dëshmorëve të UÇK-së.
Qeveria gjithashtu përmes një komunikate zyrtare ka thënë se distancohet nga veprimet e tilla të një ministri dhe se delegacioni i ministrave shqiptarë në mënyrë private ka marrë pjesë në këto homazhe, raporton Ina.
Disa parti dhe shoqata maqedonas kanë kërkuar përgjegjësi nga Qeveria, por dhe dorëheqjen e ministrit Besimi.
Partitë opozitare LSDM dhe PLD kanë kërkuar dorëheqjen dhe përgjegjësi nga Qeveria. Kësaj kërkese i janë bashkëngjitur edhe Kongresi Botëror Maqedonas, Shoqatave e ish-pjesëtarëve të forcave maqedonase të sigurisë, Forumi për Siguri dhe shoqata tjera.
Por, nga ana tjetër, ministri Besimi dje ka rikonfirmuar se ka qenë pjesë e një delegacioni qeveritar të udhëhequr nga zëvendëskryeministri Musa Xhaferri dhe se me praninë e pjesëtarëve të ARM-së nuk është shkelur ligji i mbrojtjes. /Telegrafi/
