Kërkojnë normalizim raportesh Kosovë-Serbi
Sekretarja amerikane e Shtetit, Hillary Clinton ka mbështetur sot në Beograd procesin e integrimit evropian të vendeve të rajonit dhe njëkohësisht ka përkrahur dialogun Kosovë - Serbi, duke theksuar se kjo gjë nuk nënkupton se Serbia duhet ta njohë pavarësinë e Kosovës, njofton agjencia serbe e lajmeve BETA. “Nuk kemi ardhur këtu që të paraqesim kushte apo të ushtrojmë kontroll”, ka thënë Clinton, duke shtuar se e ardhmja e Serbisë gjendet brenda vetë këtij shteti.
Ajo i bëri këto komente pas takimit me presidentin e Serbisë, Tomislav Nikolic dhe kryeministrin serb, Ivica Dacic, në të cilin mori pjesë edhe shefja e politikës së jashtme të BE-së, baronesha Catherine Ashton.
Clinton citohet të ketë thënë se dëshiron që ta shohë jetësimin e të gjitha aspiratave të Serbisë dhe të gjitha vendeve të rajonit, në rrugën e tyre drejt BE -së dhe NATO-s, transmeton REL.
“Shtetet e Bashkuara apelojnë tek të gjitha palët që t’i zbatojnë marrëveshjet e arritura, t’i aplikojnë masat konkrete për normalizimin e marrëdhënieve”, ka shtuar më tutje Clinton.
Ajo ka përshëndetur ngritjen e bisedimeve në nivel politik ndërmjet Prishtinës dhe Beogradit, duke e cilësuar si një mundësi për vazhdimin e dialogut për çështje thelbësore.
Ngjashëm është deklaruar edhe shefja e politikës së jashtme të BE-së, Cahterine Ashton.
“Jemi marrë vesh që ta vazhdojmë dialogun dhe kemi planifikuar që së shpejti të takohemi sërish. Është jetike që të dyja palët në plotëni t’i zbatojnë të gjitha marrëveshjet”, ka thënë Ashton.
Pas takimit, edhe kryeministri serb, Ivica Dacic ka thënë se Serbia angazhohet që të gjitha çështjet e hapura me Kosovën t’i zgjidhë përmes rrugës paqësore
Ai shtoi se pret që dialogu me Prishtinën të vazhdojë në muajin nëntor. /Telegrafi/
