Kërkon drejtësi
Mes 3 dhe 4 shkurtit të vitit 2000, në veri të Mitrovicës vriten 11 shqiptarë. Deri sot, askush nuk ka dhënë përgjegjësi për këtë krim.Shaip Canhasi, në 12 vjetorin e vrasjes së bashkëshortes së tij, thotë se nuk është lodhur duke kërkuar drejtësi, por duke mos marrë përgjigje.
Plaku, i cili jeton i vetmuar prej asaj kohe, nuk dëshiron ta përkujtojë atë natë tmerri.
"Jam lodhur e mërzitur dhe nuk kam guxim të hyj shumë thellë për ta rikujtuar atë natë. Nga mërzia dhe sëmundja më duhet të përdor rregullisht hapa", thotë ai për Kosovapress.
Plaku mitrovicas, i cili rregullisht viziton varrin e bashkëshortes së vrarë, thotë se kurrë nuk ka marrë përgjigje nga institucionet, në lidhje me këtë rast. Ai pretendon se dihen edhe vrasësit, prandaj ndjehet “edhe më keq që policia dhe institucionet relevante nuk veprojnë në këtë drejtim”.
“Ajo që ka ndodhur, nuk kthehet më prapa”, thotë ai. “Tash jam lodhur dhe nuk më ka mbetur shumë forcë, por nga e vërteta nuk do të heq dorë asnjëherë". /Telegrafi/
