Klapacova: BE-ja nuk ka pasur politikë të duhur për Ballkanin

Sipas saj, qëndrimi i Sllovakisë nuk është i drejtuar kundër Kosovës, por mënyrës se si ka ndodhur pavarësia.

“Ka disa arsye për këtë. Ka shumë parti politike në Sllovaki dhe të gjitha nga to kanë arsye të ndryshme. Arsyeja më e rëndësishme ka të bëjë me marrëdhëniet e mira ndërfqinjësore. Pra, ky pozicion i Sllovakisë nuk është i drejtuar kundër Kosovës dhe pavarësisë së saj, por ka mospajtime për mënyrën se si ka ndodhur pavarësia. Për aq kohë sa Serbia dhe Kosova të jenë në gjendje që të ndërtojnë marrëdhënie në mes vete, Sllovakia mund do ta pranojë Kosovën – në çdo kohë”, theksoi Klapacova.

Duke folur për mosunitetin e BE-së, Klapacova thotë se ky mekanizëm as që ka provuar të ketë pozicion të unifikuar për Kosovën.

Ajo ka folur edhe për vizitën e ish-kryeministrit sllovak, Mikulas Dzurinda.

“Dzurinda ka qenë në Kosovë së fundmi. Unë kam qenë me të. Ai ka biseduar me autoritete të ndryshme në Prishtinë, si dhe në Beograd, për çështjet politike në të dyja vendet. Por, qëndrimi i tij nuk ka qenë në formën e ofertës ‘ja ku jam, dua të ndërmjetësoj’. Ai ka qenë në cilësinë e ish-kryeministrit, si dhe të anëtarit të Parlamentit sllovak dhe të Komitetit për çështje të jashtme, për të siguruar informacione të mjaftueshme, në mënyrë që ta kuptojë më mirë situatën. Kjo ishte e tëra”, tha ajo.

Analistja sllovake duke folur për Kosovë tha se është një shtet, që përballet me disa çështje të vështira, të cilat duhet të zgjidhen.

“Ndër to, gjetja e zgjidhjes për veriun, e cila është shumë e rëndësishme. Pastaj është edhe çështja e komunitetit ndërkombëtar. Që Kosova të jetë plotësisht e pavarur, prezenca e institucioneve ndërkombëtare përfundimisht duhet të zvogëlohet. Natyrisht, Kosova duhet të punojë edhe në zhvillimin ekonomik, si dhe në çështje të tjera. Personalisht, besoj se Kosova do të mund t’i arrijë këto qëllime”, tha ndër të tjera Lucia Klapacova. /Telegrafi/