Klosi: Berisha dështoi me të gjitha
Partia Socialiste deklaroi të mërkurën se kryeministri Sali Berisha ka dështuar në çdo aspekt të qeverisjes, duke përfshirë edhe luftën kundër krimit. Deputeti i PS-së, Blendi Klosi po ashtu tha se në krye të SHISH emërohen njerëz që i kryejnë shërbime vetëm kryeministrit.
“Sali Berisha ka dështuar në qeverisje, në përmbushjen e kërkesave të BE-së apo me zgjedhjen e një presidenti konsensual....Berisha vendosi një shërbëtor në krye të vendit dhe si në vitin ‘97 vuri në SHISH vendosi një njeri që të mbarojë vetëm problemet e tij. Sot një tjetër krim ka ndodhur, çfarë bën Policia e Shtetit. Sa vlerë ka jeta e shqiptarit, çfarë bën policia e shtetit dhe sa të tjerë duhet të vriten që dikush, diku të mbajë përgjegjësi”, tha deputeti socialist, duke iu referuar vrasjes në qytetin e Elbasanit.
Sipas tij, Shqipëria rrezikon për herë të tretë procesin e integrimit për shkak të mos përmbushjes së kritereve.
Ai akuzoi gjithashtu kryeministrin se nuk është i interesuar për pavarësinë e gjyqësorit, pasi i intereson një sistem i gjunjëzuar përpara familjes dhe pushtetit të tij. /Telegrafi/
