Konkursi “problematik” për drejtorë të klinikave
Zgjedhja e drejtorëve të klinikave të QKUK-së edhe kësaj radhe ka shkaktuar mospajtime, si nga kandidatët që nuk arritën të përzgjidhen në krye të klinikave, po ashtu edhe nga sindikalistët e shëndetësisë.Doktoresha Sueda Latifi Hoxha, gjinekologe, është njëra nga kandidatet për drejtoreshë të Klinikës Gjinekologjike Obstetrike, e cila nuk është përzgjedhur si udhëheqëse.
“Nuk ka shkuar në rregull. Bazuar në të gjitha veprimet dhe aftësitë profesionale të cilat i kam dëshmuar gjatë 33 vjetëve në profesion, e 25 në arsim, kam konsideruar se jam lider i denjë dhe strategjik për udhëheqjen e klinikës gjinekologjike. Por, komisioni ka vendosur ndryshe... Sa është i denjë komisioni që të na vlerësojë, është një gjë që duhet të diskutohet”, thotë Hoxha për “Radion Evropa e Lirë”.
Ministri i Shëndetësisë, Ferid Agani, nuk ka njohuri se është bërë ndonjë shkelje procedurale.
“Në mënyrë zyrtare ende nuk kam marrë asnjë ankesë. Nga anash kam marrë informata se është shpallë lista e drejtorëve dhe se në mesin e atyre që kanë konkurruar ka pasur pakënaqësi që e konsideroj se është normale", thotë ai.
Blerim Syla, kryetar i Sindikatës së Shëndetësisë, pohon se sindikata në fjalë ka pasur mjaft ankesa lidhur me përzgjedhjen e udhëheqësve të klinikave.
“Ne kemi shumë ankesa. Janë adresuar ankesat në këshillin e pavarur dhe në Ministrinë e Shëndetësisë. Se çka do të ndodhë, do të shohim në ditët në vijim”, shprehet ai.
As ushtruesi i detyrës së sekretarit të përhershëm në Ministrinë e Shëndetësisë, Gani Shabani, i cili njëherazi edhe është përgjegjës për procedurën në fjalë, nuk ka përgjigje lidhur me këtë çështje.
“Raporti nga komisioni vlerësues ende nuk ka ardhur te ne”.
Nexhmedin Shala, anëtar i komisionit vlerësues për zgjedhjen e drejtorëve të klinikave, deklaron se janë përzgjedhë të gjithë ata që i kanë përmbushur kriteret, bazuar në statutin e QKUK-së. Xhemajl Selmani, kryetar i sindikatës së QKUK-së, nuk mendon kështu.
“Kanë bërë shkelje rreth afateve ligjore dhe shkelje që i kanë evidentuar aktivistët tanë që kanë marrë pjesë gjatë përzgjedhjes së drejtorëve. Gjitha ankesat, edhe të ndara, por edhe grupore që i kanë bërë doktorët, ne do t’i analizojmë dhe pastaj do të dalim me qëndrimin tonë”, thekson Selmani.
Zyrtarë në Qendrën Klinike Universitare, kanë deklaruar se as nuk e mohojnë e as nuk e pohojnë anulimin e këtij konkursi.
“Sa i përket anulimit, unë nuk e mohoj e as nuk e pohoj që do të ketë anulim. Një gjë dihet: komisioni ka vepruar në bazë të ligjeve në fuqi”, thotë Shpend Fazliu, zëdhënës në këtë institucion.
Sidoqoftë, klinikat brenda QKUK-së, për më shumë se dy vjet udhëhiqen nga ushtrues detyre, gjë që konsiderohet si e kundërligjshme nga ekspertë shëndetësorë. /Telegrafi/
