Konsolidimi i gjyqësorit, sfidë vendimtare
Presidenti i Shqipërisë, Bujar Nishani, ka pritur në një takim kreun e Prezencës së OSBE-së në Shqipëri, ambasadorin Eugen Wollfarth, gjatë bashkëbisedimit me të cilin vuri theksin në konsolidimin e sistemit gjyqësor si një sfidë vendimtare për vendin.Kreu i Shtetit shqiptar vlerësoi mbështetjen e OSBE-së dhe bashkëpunimin e ngushtë me ODIHR-in dhe ekspertët e tij në kuadër të reformës zgjedhore, e cila u përmbyll me sukses gjatë këtij muaji. Presidenti nënvizoi gjithashtu kontributin personal të Wollfarth dhe vlerësoi rolin e tij për gjetjen e konsensusit politik, si në rastin e reformës së Kodit Elektoral dhe vijimin e punës për projektligjin për heqjen e imunitetit.
Ambasadori, nga ana e tij, vlerësoi zhvillimet e shpejta që Shqipëria ka bërë në fushën e reformave dhe demokratizimit të institucioneve dhe shprehu besimin se institucionet dhe politika shqiptare do të vazhdojnë në këtë rrugë edhe sa i përket projektligjit për heqjen e imunitetit, i cili do t’i shërbejë luftës kundër korrupsionit dhe krimit të organizuar.
Nishani e siguroi bashkëbiseduesin për bashkëpunimin e ngushtë të tij me të gjitha institucionet shtetërore, politike dhe shoqërinë civile në mënyrë të hapur dhe transparente për të dhënë kontributin e tij institucional në zhvillimin demokratik dhe funksionimin efikas të institucioneve demokratike. /Telegrafi/
