Kopjet e 94 librave të regjistrimit certifikohen në Nish
Më 26 dhe 27 korrik, EULEX-i i ka certifikuar 94 kopje të librave origjinale të regjistrave të Kosovës për lindjet, vdekjet dhe martesat që e mbulojnë territorin e Janjevës dhe Babushit të Muhaxherëve, Komuna e Lipjanit.Përmes projektit të EULEX-it janë certifikuar gjithsej 218 kopje të librave të regjistrit civil dhe fetar të lindjeve, martesave dhe vdekjeve për territorin e Janjevës dhe Babushit të Muhaxherëve, Komuna e Lipjanit.
Nga gjithsej 218 kopje, 124 janë për territorin e Janjevës në Komunën e Lipjanit. Në këtë projekt të vogël janë angazhuar nëntë persona prej të cilëve gjashtë janë studentë serbë.
“Së shpejti do të realizohet një Projekt më i madh që e përfshin EULEX-in, Përfaqësuesin Special të BE-së dhe Këshillin Danez për Refugjatë për t’i riprodhuar kopjet e të gjithë librave/regjistrave civil origjinal të Kosovës që aktualisht gjenden në Serbi. Numri i këtyre librave vlerësohet të jetë rreth 12,036. Kopjet e certifikuara të regjistrave origjinal janë pjesë e marrëveshjeve të arritura më 2 korrik 2012 në mes të Prishtinës dhe Beogradit në kuadër të dialogut të lehtësuar nga BE-ja”, thuhet në kumtesën e EULEX-it.
Më tej thuhet se certifikimi i kopjeve të gjitha librave ekzistues origjinal të regjistrit civil që gjenden në Serbi do t’i mundësojë Kosovës t’i ketë të dhënat e duhura dhe cilësore të regjistrit civil të nevojshme për krijimin e të dhënave të besueshme të regjistrave civil/popullatës. /Telegrafi/
