Koreja e Veriut, bombë bërthamore kundër sanksioneve?

12:34 / 3.02.2013

Koreja e Veriut mund të jetë vetëm ditë larg realizimit të një testi bërthamor që do të destabilizonte të gjithë rajonin, raportoi të dielën rrjeti amerikan “CNN”.

Pas sanksioneve të ashpra ndërkombëtare të vendosura për lëshimin e paautorizuar të një sateliti, nëpërmjet një rakete me rreze të gjatë në muajin dhjetor, Pheniani duket se po përgatit testin bërthamor si kundërpërgjigje ndaj SHBA-së dhe OKB-së.

Në të shkuarën, Koreja ka kryer dy shpërthime të nëndheshme të bombave bërthamore, në rajone të ndodhura në veriun malor të vendit.

Sipas “CNN”, pamjet e fundit satelitore, të analizuara nga ekspertët amerikanë, tregojnë për një aktivitet të pazakontë në zonat ku më parë janë realizuar shpërthimet.

”Se çfarë do të bëjë Koreja e Veriut dhe sa larg një testimi bërthamor është Pheniani këtë nuk e di askush”, deklaroi Daniel Pinkston, një analist i grupit të krizave ndërkombëtarë të Uashingtonit, transmeton TCH.

”E vërteta njihet vetëm prej shumë pak vetave brenda vetë Koresë së Veriut”, shtoi ai.

Koreja e Veriut është një prej nëntë vendeve të botës që kanë konfirmuar pasjen e armëve bërthamore në arsenalin e tyre.

Sipas ekspertëve, ushtria e vendit komunist ka nga 6-12 bomba bërthamore, mundësisht të vendosura në raketa me rreze të shkurtër e të mesme veprimi. Megjithatë, kapaciteti dhe fuqia e këtyre armëve mbetet objekt spekulimi dhe një mister ende i pazgjidhur. Përveç Koresë, vendet e tjera me kapacitete bërthamore janë SHBA, Rusia, Kina, Franca, Britania e Madhe, Izraeli, India dhe Pakistani. /Telegrafi/
 

Komente

Vërejtje:
Telegrafi ka ofruar gjithmonë hapësirë të lire për komentime dhe për diskutim, me qëllimin e mirë të nxitjes së debateve. Por, për shkak të disa komentuesve të papërgjegjshëm, që keqpërdorin këtë mundësi, kemi vendosur ta ndryshojmë qasjen drejt komentimit të lajmeve. Tash e tutje, komentuesit në rubrikat "Lajme" dhe "Ekonomi", profilin e tyre duhet ta autorizojnë me email valid.

Çdo përdorues, në panelin "Settings" duhet të vendos emailin valid, e pastaj të kërkojë që në atë adresë elektronike t'i dërgohet linku për aprovim. Ky link duhet të klikohet, që të autorizohet profili përmes të cilit mund të komentoni.