Kosova e gatshme për traktat paqeje me Serbinë
Kosova është e gatshme edhe për dialog politik me Serbinë, ka deklaruar zëvendëskryeministri i Kosovës, Hajredin Kuçi.Pas mbledhjes së qeverisë së Kosovës, ai tha se ende nuk ka ndonjë nismë konkrete për takime në nivelin e lartë politik ndërmjet Kosovës dhe Serbisë, ku përmendet sidomos takimi i mundshëm midis dy kryeministrave, por ai ka shprehur gatishmërinë e qeverisë së Kosovës për normalizimin e raporteve me Serbinë.
“Ne nuk ngarendim që të kemi takime të tilla, por ajo që mund të them është se kudo që përfaqësohet Kosova si shtet, ne nuk kemi turp të kemi takime me askënd. Të tjerët duhet të ndihen keq në raport me neve”, ka thënë Kuçi, transmeton Rel.
“Kosova dhe Serbia duhet të përfundojnë marrëdhëniet e konfliktit me një traktat të paqes. E ky traktat nënkupton që të definohen raportet ndërshtetërore, të përfshihen reparacionet e luftës...nënkupton ndërtimin e marrëdhënieve për të ardhmen. Traktatet janë marrëdhënie mes dy sovraniteteve, pra shtetet bëjnë traktate dhe jo të tjerët”, ka thënë Kuçi. /Telegrafi/
