Kosova e përkushtuar të përmbush obligimet ndaj BE-së
Kryeministri i Republikës së Kosovës, Hashim Thaçi ka pritur sot në një takim delegacion e Komisionit të Punëve të Jashtme dhe të Nënkomisionit për Siguri dhe Mbrojtje të Parlamentit Evropian.Në takim me përfaqësuesit e Parlamentit Evropian, kryeministri Thaçi ka falënderuar institucionet e BE-së për bashkëpunimin e ngushtë me Qeverinë e Kosovës dhe mbështetjen që po i japin Kosovës në procesin e integrimit.
Thaçi ka premtuar se Qeveria e Kosovës është e përkushtuar që të përmbush të gjitha obligimet ndaj BE-së dhe se bashkëpunimi me mekanizmat BE-së është një ndër prioritetet e larta të saj.
Kreu i ekzekutivit të Kosovës, situatën e sigurisë e ka vlerësuar stabile dhe të qëndrueshme dhe se institucionet e sigurisë janë të përkushtuara për të siguruar mirëqenien dhe lirinë e gjithë qytetarëve të Republikës së Kosovës pa dallim, thuhet në njoftimin e lëshuar nga Zyra e Kryeministrit.
“Qeveria e Kosovës është e angazhuar të zbatojë strategjinë e saj për pjesën e veriut të Kosovës, që ka për qëllim të sigurojë zbatimin e rendit dhe ligjit dhe fillimin e investimeve socio-ekonomike edhe në këtë pjesë të vendit”, ka thënë kryeministri Thaçi.
Përfaqësuesit e Parlamentit Evropian i kanë dhënë mbështetje procesit të normalizimit të marrëdhënieve ndërshtetërore mes Kosovës dhe Serbisë, proces ky që ndërlidhet me përmbushjen e standardeve të integrimit të të dyja vendeve në Bashkimin Evropian. /Telegrafi/
