Krasniqi dënon sulmin brutal ndaj Policisë së Kosovës
Kryetari i Kuvendit të Kosovës, Jakup Krasniqi, ka dënuar sulmin brutal ndaj pjesëtarëve të Policisë së Kosovës nga ana e grupeve të huliganëve nga Republika e Serbisë.Këto grupe tentuan dhunshëm të hyjnë në territorin e Republikës së Kosovës, megjithëse paraprakisht nuk kishin bërë kërkesë në organet përkatëse të Republikës së Kosovës për të marrë pjesë në manifestime.
“Me sjellje të këtilla të paskrupullta grupet e huliganëve bënë shkelje të rëndë të rendit dhe ligjit, duke sulmuar pjesëtarët e Policisë së Kosovës me mjete të forta, veprime këto të patolerueshme, të cilat si të tilla përbëjnë sulm mbi rendin kushtetues të Republikës së Kosovës”, theksohet në deklaratën e kryekuvendarit Krasniqi. /Telegrafi/
