Krasniqi tërheq cilësimet ndaj ministrave
Kryetari i Kuvendit të Kosovës, Jakup Krasniqi, në mbyllje të seancës së Kuvendit, ka tërhequr fjalën e djeshme për ministrat. Krasniqi të enjten e kishte quajtur rrugaç ministrin Bajram Rexhepi, pas një debati të nxehtë rreth pranisë së policisë në objektin e Parlamentit dhe rreth tij.
“Para jush dhe para opinionit, unë e tërheq fjalën e djeshme për ministra. Pavarësisht e ndryshon kjo gjendjen apo jo, unë e tërheq fjalën”, ka thënë kryeparlamentari Krasniqi.
Kryetari i Kuvendit mungoi gjatë hapjes së seancës së sotshme të Parlamentit, por ishte i pranishëm në përfundim të saj.
Seanca e sotme e Kuvendit ishte vazhdim i seancës i së enjtes.
Deputetët kanë shqyrtuar Projektligjin për ratifikimin e amendamentit të neneve të Marrëveshjes së Fondit Monetar Ndërkombëtar për reformën e Bordit Ekzekutiv, Projektligjin për rritjen e kuotës së Republikës së Kosovës në Fondit Monetar Ndërkombëtar, si dhe në shqyrtim të parë edhe Projektligjin për punimet nga metalet e çmuara.
Pas shqyrtimit të dytë, deputetët kanë miratuar Projektligjin për shfuqizimin e neneve 37, 38 dhe 39, të Kodit Penal të Republikës së Kosovës, si dhe Projektligjin për mbrojtjen e konsumatorit.
U shqyrtua dhe u miratua edhe Raporti i punës së Komisionit Qendror të Zgjedhjeve për vitin 2011. /Telegrafi/
