Kryekomunarët e PDK-së qeverisin nga Prishtina
Së paku katër kryetarë komunash që vijnë nga Partia Demokratike e Kosovës, nuk jetojnë aty ku qeverisin. Nexhat Demaku, Sami Lushtaku, Sokol Bashota dhe Shukri Buja, kanë zgjedhur që ta bëjnë gjumin në Prishtinë, e ditën ta kalojnë në zonat ku e kanë marrë besimin e qytetarëve për t’i udhëhequr, shkruan gazeta “Tribuna”.
Një veprim i tillë, pos që është në kundërshtim me Ligjin për vetëqeverisje lokale, i cili parasheh që çdo kryetar komune është i obliguar të këtë vendbanim të përhershëm në komunën të cilën e udhëheq, është edhe i kushtueshëm për xhepin e qytetarëve.
Kjo për faktin se për çdo ditë këta kryetarë udhëtojnë me vetura zyrtare duke bërë dhjetëra kilometra me paratë e taksapaguesve, për të shkuar në vendin e punës.
Gazeta ka provuar të kontaktojë më këta kryetarë, mirëpo përveç kryetarit të Drenasit, Nexhat Demakut, kontakti me të tjerët ka qenë i pamundur.
E Demaku ka mohuar se jeton në Prishtinë, ndonëse është demantuar nga përfaqësuesit e opozitës në Drenas. /Telegrafi/
