Kuçi: Rezoluta 1244 vazhdon të jetë ende gjallë
Drejtuesit e Qeverisë së Kosovës nuk dëshirojnë të komentojnë sa i përket marrëveshjes së pritshme në Bruksel pa përfunduar raundi i bisedimeve atje, përderisa thonë se delegacioni i Kosovës ka shkuar në këtë raund bisedimesh me qëndrim të qartë.Zëvendëskryeministri Hajredin Kuçi, tha se qëndrimi i Kosovës për këtë çështje është i qartë për të gjithë. “Qeveria e ka shprehur qëndrimin e qartë. Delegacioni i Kosovës e ka qëndrimin e qartë brenda atij qëndrimi”, ka thënë Kuçi për RTK-në.
I pyetur se në raport me Kosovën, cila ka më shumë peshë, rezoluta 1244 apo opinioni i GJND-së, Kuçi, deklaroi se ndikimin më të madh juridik e ka Deklarata e Pavarësisë, por rezoluta 1244 vazhdon të jetë ende gjallë.
“Kjo është çështje e balancave që mund t’i quaj edhe politike edhe juridike. Në kuptimin politik me siguri që GJND-ja ka më shumë ndikim për ne, por mbi të gjitha në kuptimin juridik për ne ka ndikim Deklarata e Pavarësisë së Republikës së Kosovës, Kushtetuta dhe ligjet, por natyrisht është gjallë ende Rezoluta 1244”, ka thënë Kuçi.
Zëvendëskryeministri Kuçi, tha më tej se fusnota ka të bëjë me raportet ndërshtetërore, ngase përfaqësimi rajonal është ndërmjet dy shteteve, nuk është për çështje të brendshme dhe nuk është çështje teknike. /Telegrafi/
