LDK: PDK-ja po përpiqet të manipulojë

Sipas LDK-së, Partia Demokratike po përpiqet të manipulojë për të larguar vëmendjen nga kaosi që e ka përfshirë.

“Në një komunikatë të qarkulluar mbrëmë vonë, partia Demokratike e Kosovës e Hashim Thaçit, kërkonte nga Lidhja Demokratike e Kosovës që të marrë “qëndrimin distancues ndaj njerëzve inkriminues të llojit të Enver Sekiraqës, dhe të distancohet nga lufta politike me fushatat e tilla linçuese ndaj luftës çlirimtare. Lidhja Demokratike e Kosovës e konsideron absurde një kërkesë të tillë të PDK-së”, thuhet në kumtesën e LDK-së.

Kjo parti theksoi se nuk ka pse të distancohet nga pretendimet dhe veprimet që nuk kanë të bëjnë me të.

“PDK-ja e ka gabuar adresën, meqë Enver Sekiraça nuk ka pasur dhe nuk ka asnjë funksion në Lidhjen Demokratike të Kosovës, asnjë lidhje me LDK-në dhe nuk ka folur e nuk flet në emër të LDK-së. Qëndrimet e Lidhjes Demokratike të Kosovës i bën publike kryetari i saj, strukturat drejtuese dhe askush tjetër”, vlerësoi LDK .

Kjo parti tha se PDK-ja, me deklarata të tilla absurde, po përpiqet ta largojë vëmendjen nga mosmarrëveshjet e brendshme dhe kaosi që e ka përfshirë.

Lidhja Demokratike e Kosovës i bëri thirrje PDK-së që të heqë dorë nga manipulimet e kësaj natyre dhe të tregojë seriozitet në raportet me partitë politike dhe në komunikimet publike. /Telegrafi/