Letër BE-së për vazhdimin e mandatit të EULEX-it?
Zëvendëskryeministri, njëherësh ministër i Drejtësisë, Hajredin Kuçi, është takuar me përfaqësuesin Special të Bashkimit Evropian në Kosovë, Samuel Zbogar, me zëvendës ambasadoren e Shteteve të Bashkuara të Amerikës në Kosovë, Kelly C. Degnan dhe zëvendës shefin e Misionit të EULEX-it, Andy Sparkes, me të cilët është diskutuar roli dhe mandati i EULEX-it pas përmbylljes së pavarësisë së mbikëqyrur.Në njoftimin për media thuhet se po ashtu u diskutua nevoja për një ftesë zyrtare nga Qeveria e Kosovës, drejtuar Bashkimit Evropian, për vazhdimin e Misionit të EULEX-it në Kosovë, e bazuar në Kushtetutën e Kosovës, e ashtuquajtur “Shkëmbim i Letrave.”
Me këtë rast, zëvendëskryeministri Kuçi theksoi se ‘Shkëmbimi i Letrave’ mes Kosovës dhe BE-së duhet të ketë disa gjëra parasysh; respektimin e bazës ligjore të Kosovës; kufizimin e mandatit te EULEX-it deri më qershor, 2014; pëlqimin e gjyqtarëve dhe prokurorëve nga institucionet e Kosovës; krijimin e një marrëveshje bilaterale mes Kosovës dhe BE-së nëpërmjet këtij Shkëmbimi Letrash, dhe miratimin e marrëveshjes nga Kuvendi i Kosovës.
.jpg)
Zëvendëskryeministri Kuçi kërkoi gjithashtu ndihmë nga EULEX-i për procesin e liberalizimit të vizave dhe marrëveshjen e Stabilizim- Asocimit.
Po ashtu sa i përket definimit të detyrave të EULEX-it, Kuçi tha se duhet: zhvilluar objektiva të qarta me afate të caktuara për detyrat e përmendura në këtë marrëveshje; analizuar pasojat ligjore dhe buxhetore për sa i përket këtyre detyrave, si dhe duhet të përfshihet Plani për Transferimin e Kompetencave nga EULEX-i në Institucionet e Kosovës, siç u propozua në tetor, dhe përsëritur në maj të 2012-së në Bruksel. /Telegrafi/
