LSI: Dacic, mos i provoko shqiptarët e Luginës së Preshevës

15:47 / 5.01.2013

Nënkryetarja e Lëvizjes Socialiste për Integrim, Klajda Gjosha, ka reaguar sot duke i cilësuar provokuese për shqiptarët deklaratat e kryeministrit të Serbisë, Ivica Dacic. Gjosha i është referuar deklaratës ku Dacic kërkon heqjen e monumentit të Preshevës.

"I cilësojmë qëndrimet e fundit të Kryeministrit Dacic si provokime të hapura ndaj popullsisë shqiptare të Luginës së Preshevës, të cilat nuk janë aspak në linjë me frymën demokratike të Bashkimit Evropian dhe si tërësisht të panevojshme në kontekstin konstruktiv historik ku ndodhet sot rajoni i Ballkanit Perëndimor. Konsiderojmë se shqiptarët e Luginës së Preshevës kanë të drejtat e tyre të pakontestueshme që lidhen me lirinë e shprehjes, mbrojtjen dhe kultivimin e identitetit, kulturës, gjuhës dhe vlerave të tyre kombëtare e historike, ashtu siç sanksionohen edhe nga Konventa Evropiane e të Drejtave të Njeriut, dhe shprehim bindjen se ushtrimi i këtyre të drejtave nuk cënon aspak integritetin territorial të Serbisë. Kërcënimi për kufizimin e këtyre të drejtave është një sinjal negativ për integrimin evropian të Serbisë, ndërkohë që kushtëzimi i vazhdimit të bisedimeve mes Kosovës dhe Serbisë me heqjen e monumentit në Preshevë, nuk i shërben aspak klimës së fqinjësisë së mirë dhe mbarëvajtjes së paqes dhe stabilitetit në rajonin tonë", tha ajo përmes një komunikate për shtyp.

Në reagimin e saj Gjosha shprehet se "i bëjmë thirrje Kryeministrit Dacic për tërheqje nga deklarata të tilla provokuese, dhe inkurajojmë përfaqësuesit e zgjedhur të faktorit shqiptar në Serbi të reagojnë me përgjegjshmëri dhe pjekuri demokratike ndaj çdo lloj kërcënimi, duke shpresuar njëkohësisht se qetësimi i situatës do t’i shërbente avancimit të agjendës evropiane të të gjithë rajonit".

Deklarata e Dacic është bërë në dhjetor të vitit të kaluar. Kryeministri serb i ka “ftuar” shqiptarët e Luginës së Preshevës që të heqin lapidarit me emrat e ushtarëve të rënë UÇPMB-së, e ngritur në qendër të Preshevës.

"Është më mirë që ta heqin vetë (monumentin - v.j.) ose e heqim ne”, ka thënë Dacic. /Telegrafi/

Komente

Vërejtje:
Telegrafi ka ofruar gjithmonë hapësirë të lire për komentime dhe për diskutim, me qëllimin e mirë të nxitjes së debateve. Por, për shkak të disa komentuesve të papërgjegjshëm, që keqpërdorin këtë mundësi, kemi vendosur ta ndryshojmë qasjen drejt komentimit të lajmeve. Tash e tutje, komentuesit në rubrikat "Lajme" dhe "Ekonomi", profilin e tyre duhet ta autorizojnë me email valid.

Çdo përdorues, në panelin "Settings" duhet të vendos emailin valid, e pastaj të kërkojë që në atë adresë elektronike t'i dërgohet linku për aprovim. Ky link duhet të klikohet, që të autorizohet profili përmes të cilit mund të komentoni.