Lufta për të “djathtën”
Ftesa e partisë më të madhe opozitare, LDK-së, për të formuar koalicionin e partive të djathta në Kosovë, konsiderohet jokoherente në këtë periudhë.Kjo për faktin se partitë politike, përveç “Vetëvendosjes”, nuk janë përcaktuar ideologjikisht se cilit tabor i takojnë, ta djathit apo të majtit. Derisa të gjitha të tjerat ose deklarohen të djathta ose të qendrës së djathtë, politikat që i zhvillojnë i nxjerrin nga ky tabor, shkruan “Zëri”.
Analistët politikë vlerësojnë se orientimi ideologjik i partive politike në Kosovë është ende në suaza deklarative.
Për shkak të konotacionit negativ që mund ta ketë e majta, nga historia, vetëm një parti deri më tani është deklaruar e majtë.
Ndërkaq, iniciativa e LDK-së, për një bllok të djathtë, sipas analistit Krenar Gashi, ende nuk është ofertë për një bllok politik, porse, sipas tij, ajo mund të quhet vetëm një nismë për një gjë të tillë.
Shefi i Grupit Parlamentar të PDK-së, Adem Grabovci, ka thënë se LDK-ja kur u ka bërë ftesë partive të djathta e ka huq adresën, pasi që, sipas tij, parti e djathtë dhe më e madhe në Kosovë është PDK-ja.
“Ne i vlerësojmë të gjitha partitë, mirëpo LDK-ja me krizën e brendshme që e ka bën përpjekje ta zhvendosë vëmendjen nga vetvetja në dikë tjetër. Megjithatë PDK-ja i ka të qarta përcaktimet e veta dhe ato janë të djathta”, ka thënë Grabovci. /Telegrafi/
