Masakra e Poliçanit, arrestohet dhunuesi i kufomës

Guri, i cili qëndronte i fshehur në një banesë të qytetit është arrestuar pas aksionit të zhvilluar nga forcat e policisë lokale, të cilat janë ndihmuar edhe nga forcat speciale.

Një ditë më parë, sapo ka parë vëllain e vdekur dhe ka mësuar se kush ishte autori i kësaj vrasje, me sopat në dorë, Kushtrim Guri i është vërsulur kufomës së rojës, duke e qëlluar disa herë në qafë.

Kushtrim Guri është arrestuar për kryerjen e veprës penale të “Dhunimit të varreve”, të parashikuar në nenin 118 të Kodit Penal.

“Dhunimi i varrezave, varreve, nxjerrja e kufomës si dhe vjedhja e sendeve që mund të ndodhen në to, si dhe çdo veprim tjetër që ul respektin ndaj të vdekurit, dënohet me gjobë ose me burgim gjer në pesë vjet”, theksohet në nenin 118 të Kodit Penal, akuzë për të cilën do të përgjigjet shtetasi Kushtrim Guri.

Ngjarja ka ndodhur mëngjesin e së hënës, kur shefi i sigurisë teknike të armatimit në uzinën e Armëve të Poliçanit, Vladimir Guri është qëlluar për vdekje nga roja Shpëtim Dervishi.

Ky i fundit menjëherë më pas, është futur në kabinën e rojës dhe i ka dhënë fund jetës duke u vetëqëlluar me të njëjtën armë zjarri.

Pas këtij krimi, vëllai i të vrarit Vladimir Guri, është futur në repartin ushtarak ku ndodhet uzina e armëve, dhe i është sulur rojës që ishte i vdekur, duke i prerë kokën vrasësit të vëllait të tij.

Dyshimet janë se sherri i nxehtë erdhi për shkak të një grindjeje lidhur me një familjare të personave të përfshirë në krimin e rëndë, e cila ishte larguar nga puna, transmeton NOA. /Telegrafi/