MASHT ndau 100 licencat e para për mësimdhënës
Ministria e Arsimit, Shkencës dhe Teknologjisë (MAShT) ka ndarë sot në Prishtinë 100 licencat e para për mësimdhënës në Republikën e Kosovës. Me këtë aktivitet, në një ceremoni solemne, u shënua edhe 100 vjetori i shpalljes së pavarësisë së Shqipërisë.Me këtë rast, ministri i Arsimit, Ramë Buja përmendi faktin se iniciativat e këtij procesi kanë filluar që nga viti 2004, por në vitin 2008 me mbështetje të Bankës Botërore (BB), filloi diferencimi në nivelin e pagesave në bazë të kualifikimit, përvojës dhe nivelit arsimor.
Pasi që e vlerësoi këtë ditë si një ngjarje të veçantë për arsimin në Kosovë e sidomos për mësimdhënësit, ministri Buja premtoi se gjatë këtij viti të gjithë mësimdhënësit do të pajisen me licenca të rregullta.
Ndërsa, kryetari i Këshillit Shtetëror për Licencimin e Mësimdhënësve (KShLM), Nehat Mustafa tha se procesi i licencimit bartë katër komponentë kyçe: zhvillimin profesional, vlerësimin e performancës, avancimin e kualifikimit të mësimdhënësve dhe vet procesin e licencimit.
Mustafa falënderoi, me këtë rast, partnerët zhvillimor, të cilët e mbështesin procesin e licencimit dhe zhvillimit profesional të mësimdhënësve, me theks të veçantë Banka Botërore, Komisioni Evropian, USAID-i, GIZ-i etj.
Ndërsa, Flora Kelmendi nga BB theksoi se arsimi cilësor është një prej mjeteve më të fuqishme për të kaluar nga një proces në tjetrin dhe tha se këto nuk janë edhe pa vështirësi. Ajo potencoi mbështetjen që ka ofruar gjatë këtyre viteve dhe që do të ofrojë edhe në të ardhmen Banka Botërore në kuadër të procesit të licencimit.
Në fund, ministri Buja dhe kryetari i KShLM-së Mustafa ndanë edhe 100 licencat dhe vendimet për 100 mësimdhënësit e 7 rajoneve të Kosovës, duke përfshirë të gjitha komunat dhe në mesin e tyre edhe mësimdhënës nga minoritetet. /Telegrafi/
