Mbyllen hetimet ndaj Spahiut
Janë mbyllur të mërkurën zyrtarisht hetimet për ish-nënkryetarin e Këshillit të Lartë të Drejtësisë, Kreshnik Spahiu. Pavarësisht dorëheqjes, mazhoranca duket se do ta çojë deri në fund çështjen, pasi do t’i kërkojë Parlamentit të marrë një vendim për shkarkimin e tij.Start njofton se komisioni parlamentar i përbërë vetëm nga deputetët demokratë do të dalë një raport të vetin, i cili do të miratohet në Parlament gjatë së enjtes. "Jemi përfundimisht në përmbushje dhe të planit të hetimit ku jemi në kushtet për të deklaruar përfundimin e hetimeve", tha kryetari i komisionit, Enkelejd Alibeaj.
Ai sqaroi se në raport janë përfshirë edhe dokumentet e ardhura nga KLD-ja për veprimtarinë e kryer nga Spahiu që nga viti 2009, kryesisht për udhëtimet e tij jashtë shtetit dhe përdorimin e automjeteve për qëllime që nuk kishin të bënin me punën e institucionit.
Kreshnik Spahiu dha dorëheqje nga posti në fillim të këtij muaji, duke pretenduar se komisioni është jashtë Kushtetutës së vendit dhe paralajmëroi një ankimim në Gjykatën Kushtetuese. /Telegrafi/
