Meta: Ramën e takova në Tetovë, por s'ishim vetëm
Kryetari i Lëvizjes Socialiste për Integrim, Ilir Meta ka konfirmuar dje takimin e dy ditëve më parë në Tetovë me liderin e Partisë Socialiste, Edi Rama, pas pjesëmarrjes në homazhet për liderin historik të PDSH-së në Maqedoni, Arbën Xhaferi.Por, Meta pretendoi se "nuk kam zhvilluar një takim kokë më kokë" duke theksuar se ndonëse kanë qëndruar fizikisht pranë njëri-tjetrit, dy liderët kanë qenë gjithmonë të shoqëruar nga një numër i madh drejtuesish të PDSH-së në Maqedoni.
"Alibinë" e kreut të LSI-së, Ilir Meta e rrëzon gazetarja e "Gazeta Shqiptare", Fatmira Nikolli, e cila ka qenë prezente në ambientet e restorantit të hotelit "Lirak" në Tetovë ku edhe u zhvillua takimi Rama-Meta.
Megjithëse në një tavolinë me 10 veta të tjera, Meta e Rama kanë qenë përkrah njëri-tjetrit gjatë gjithë kohës, dhe jo të heshtur. Bashkëqëndrimi në të njëjtën tavolinë, ka zgjatur rreth 1 orë e 3 minuta e nëse në gjysmën prej tyre ata ishin të shoqëruar, në gjysmën tjetër biseda ka qenë pothuaj kokë më kokë. Ndërsa restoranti i hotel "Lirak" gjendej krejt i boshatisur, në një tavolinë më tutje gjendeshin vetëm punonjësit e zyrës së shtypit të Partisë Socialiste, të cilët u kujdesën gjatë gjithë kohës që të mos e lejonin gazetaren e GSH të fotografonte takimin.
Mes "debateve" me punonjësit e zyrës së shtypit të selisë rozë që ngulmonin të thoshin se nuk duhej bërë foto, gazetarja e GSH mundi të shkëpuste disa syresh që tregojnë Ramën dhe Metën përkrah. Biseda mes tyre duhet të ketë qenë vërtet interesante, nëse kemi parasysh faktin se ata morën pjesë vetëm në homazhe dhe jo në ceremoninë e mbajtur tek varrezat.
Gjatë kohës, që kryhej varrimi i Arbën Xhaferrit, Rama dhe Meta kanë qenë në restorantin e hotel "Lirak", pothuajse vetëm. Herë pas here me ta, ulej edhe një mik i Arbën Xhaferrit, Miftar Zyberi. Kjo kohë bisedimi mes tyre, pa praninë e te tjerëve mund të ketë zgjatur 40 minuta. Ata dolën së bashku nga restoranti i "Lirakut" dhe secili syresh mori makinën e tij, dhe shkuan në të njëjtin drejtim. Por, asnjëri prej tyre nuk shkuan tek varrezat, ndaj mendohet se ose kanë shkuar në një kafe ku mund të bisedonin pa përgjimin e gazetarëve, ose mund të jenë nisur drejt Tiranës.
Pretendimin e Metës se nuk ka zhvilluar një takim privat me Ramën e rrëzon pra pikërisht fakti i mosprezencës së tyre në ceremoninë e varrimit të Arbën Xhaferit. Për më tepër që drejtuesit e PDSH-së që gjendeshin fillimisht në tavolinën e Metës e Ramës, nuk kanë qenë prezentë në ambientet e hotel "Lirakut" në Tetovë, në momentet që trupi i pajetë i Xhaferit po përcillej për në banesën e fundit, transmeton BalkanWeb. /Telegrafi/
