Meta rizgjidhet në krye të LSI-së
Lëvizja Socialiste për Integrim votoi dje për kreun e ri përmes parimit "një anëtar, një votë". Në garë u përballën kreu aktual Ilir Meta dhe sekretari i përgjithshëm Luan Rama. Ndërsa sot KQZ e LSI e drejtuar nga kryetari Ylli Manjani shpalli rezultatet, pas numërimit të votave. Sipas tij, kandidati Ilir Meta ka marrë 78.6% të votave kundrejt 21,4 për qind të Luan Ramës. Nga 36.725 anëtarë kanë votuar dje 31.422 në të gjitha qendrat e hapura të votimit, deklaroi Kreu i KQZ-së Ylli Manjani.
Duke i uruar suksese Ilir Metës në drejtimin e LSI-së, Luan Rama theksoi se “në LSI mbyllëm një garë dhe një proces shumë të rëndësishëm. Proces demokratik, kjo është rruga nga e cila duhet të shkohet", tha ai.
Do të ruajmë debatin si vlerë të brendshme të LSI-së. Në zgjedhjet e 2013 LSI të fitojë më shumë mbështetës”, shtoi Rama, transmeton BW.
Ndërsa Ilir Meta, menjëherë pas publikimit të rezultatit, gjeti rastin t’i kërkojë ndjesë anëtarëve në zonat e largëta të vendit të cilët nuk mundën të votonin për shkak të numrit të kufizuar të qendrave të votimit, sicc tha ai.
“Ishte një proces demokratik e transparent, kishim një numër të kufizuar qendrash votimi, të gjithë ata që s’patën mundësi të merrnin pjesë, jam i sigurt që janë disa mijëra, do ta shprehin angazhimin e tyre në një garë më të madhe, atë të 2013”, tha ai.
Meta e cilësoi këtë fitore të bazuar tek gara dhe debati.
“Kjo është një fitore shumë e bukur, vjen pas një debati. Fitorja më e madhe është hapja e një debati brenda LSI, të vazhdojë edhe në konventën që zhvillojmë javën tjetër e në vazhdim. Do vijojmë të jemi një forcë shembull për raportet demokratike”, tha Meta. /Telegrafi/
