Ministria e Arsimit, skandal financiar me kompaninë serbe

Raporti i Kontrollit të Lartë të Shtetit (KLSH) të kryer në mars të vitit 2010, ka evidentuar se nga kontrata që Ministria e Arsimit ka bërë me firmën serbe, në Beograd, ‘MpSoft Group’ dhe ‘CT Computers’, për instalimin e laboratorëve të informatikës në të gjitha shkollat e arsimit bazë janë vendosur pajisje me cilësi më të ulët kundrejt atyre, për të cilët është paguar dhe se mungojnë pajisje në disa prej shkollave, raporton TCH.

Për këtë arsye KLSH vëren se buxhetit të shtetit i është shkaktuar një dem financiar prej qindra milionë lekësh.

Sipas këtij raporti rezulton se kompania serbe ka sjellë pajisje laboratorike të një cilësie më të ulët sesa ajo që ishte parashikuar në kontratë, kur ndërkohë Ministria ka paguar gati 209 mijë dollarë më shumë, sikur ato pajisje të ishin, të një cilësie më të lartë.

Ndërkohë edhe në doganë Ministria e Arsimit ka paguar rreth 4.3 milionë lekë detyrim, sikur pajisjet të ishin të markës së përcaktuar në kontratë dhe jo për pajisjet që janë zhdoganuar realisht, të cilat kanë çmim më të ulët.

KLSH vëren gjithashtu, se për shkak të vonesave në realizim projekti i kompanisë serbe duhej të penalizohej me rreth 373 854 mijë dollarë, por në fakt kjo shumë është mbledhur nga Ministria e Arsimit.

KLSH konstaton nga ana tjetër, që fondi i garancisë së vendosur në bankë nga kompania serbe është tërhequr përpara dorëzimit të pajisjeve, shumë kjo e barabartë me vlerën e penaliteteve, pra rreth 374 mijë dollarë.

Sipas KLSH-së nga faturat dhe nga koalidimi rezulton se malli i porositur është i tjetër cilësie dhe marke dhe nga një tjetër vend. Por veç cilësisë së ulët rezulton se nga 665 kabinete informatike, që duhet të dorëzoheshin realisht, janë dorëzuar vetëm 619 kabinete, pra 46 më pak, si dhe ka mangësi në materiale të tjera kompjuterike, si kufje, mikrofon, karta kompjuteri edhe në laboratorët e përfunduar. /Telegrafi/