Mitrovicë: 27 vjeçarja plagos vetën aksidentalisht
Autoritetet policore në Mitrovicë, të enjten rreth orës 16:45min, përmes një telefonate të pranuar nga spitali rajonal janë informuar për praninë e një femre, me plagë në njërën këmbë të shkaktuar nga arma e zjarrit, ndërsa rasti është kualifikuar si armëmbajtje e paautorizuar. Incidenti është raportuar të ketë ndodhur në rrugën “Agim Ramadani” në Mitrovicë, përkatësisht në një lokal.
“Në bazë të raporteve policore të siguruara nga dëshmitarët mësohet se e dyshuara përkatësisht e lënduara në këtë rast, një femër 27 vjeçare, ka zbrazur aksidentalisht armën, një revole tip ‘browning’s’ të kalibrit 6.35mm, për të cilën pretendon se paraprakisht e kishte gjetur dhe e kishte futur në xhepin e saj, me ç’rast një plumb i vetëm i shkrepur ka goditur këmbën e saj të majtë, duke i shkaktuar plagë depërtuese mbi gju”, bëhet e ditur në kumtesën e Policisë.
Viktima është dërguar urgjentisht në qendrën spitalore rajonale të Mitrovicës, ku edhe iu është nënshtruar intervenimit kirurgjik. Mësohet se e njëjta është jashtë rrezikut për jetë dhe pa pasoja të rënda.
Hetuesit Policor, të cilët janë duke zhvilluar hetimet lidhur me rastin së bashku me teknikët e forenzikës kanë bërë ekzaminimin e vendit të ngjarjes, nën mbikëqyrje të prokurorit publik.
Një gëzhojë e kalibrit 6.35mm së bashku me armën që besohet të ketë qenë e përfshirë në këtë rast, janë gjetur dhe marrë në vendin e ngjarjes nga hetuesit, si pjesë e provave materiale dhe procedurave të mëtejme procedurale.
Veç regjistrimit të rastit si “plagosje aksidentale”, policia ka iniciuar edhe veprimet hetimore dhe paraqitje penale për “mbajtje në pronësi, posedim dhe shfrytëzim të paautorizuar të armës”. /Telegrafi
