MPJ: Dhuna dëmton marrëdhëniet shqiptaro-maqedonase
Lidhur me situatën e tensionuar në Republikën e Maqedonisë ka reaguar Ministria e Punëve të Jashtme e Kosovës, e cila, duke dënuar aktin e rrahjes së nxënësve shqiptarë, konsideron se përshkallëzimi i dhunës gjatë ditës së djeshme e të sotme në Shkup dëmtojnë marrëdhëniet ndëretnike shqiptaro-maqedonase në këtë shtet multietnik.Ministria e Punëve të Jashtme e Kosovës (MPJ) u bën thirrje të dyja palëve në Maqedoni, veçanërisht të gjithë faktorëve politikë që të tregojnë maturi, pjekuri dhe veprim politik të përgjegjshëm për të shmangur tensionet etnike, thuhet në reagimin e MPJ të Kosovës.
Po ashtu u bëhet thirrje autoriteteve zyrtare të Shkupit që të ndërmarrin masa të vendosura për zbulimin dhe dënimin e autorëve të akteve të tilla të dhunës dhe të incidenteve me sfond etnik, duke vlerësuar se forca e ligjit duhet të veprojë ndaj kujtdo që kryen apo mbështet akte të tilla.
MPJ konsideron se është në interesin e Maqedonisë që të kultivohet fryma evropiane, toleranca dhe bashkëpunimi efektiv ndërmjet të gjitha forcave të shoqërisë, për zgjidhjen e të gjitha kontesteve të brendshme, ngase kjo është rruga e vetme për ruajtjen e paqes dhe stabilitetit të Maqedonisë dhe të rajonit si një parakusht për integrimin në strukturat evropiane dhe euroatlantike. /Telegrafi/
